ВЬЕТНАМ УЛСЫН БАРИЛГЫН САЛБАРЫН БИЗНЕС ЭРХЛЭГЧДИЙН ТӨЛӨӨЛӨЛ “УЛААНБААТАР ОРОН СУУЦЖУУЛАЛТ” ХХК-ИЙН ҮЙЛ АЖИЛЛАГААТАЙ ТАНИЛЦЛАА

Бүгд найрамдах социалист Вьетнам улсын барилгын салбарын бизнес эрхлэгчдийн төлөөллүүд өнөөдөр /2025.02.06/ “Улаанбаатар орон сууцжуулалт” ХХК-ийн үйл ажиллагаатай танилцаж, бүтээн байгуулалт, барилгажуулалтын асуудлаар санал солилцлоо.

Уулзалтын хүрээнд, “Улаанбаатар орон сууцжуулалт” ХХК-ийн хэрэгжүүлэх төслийн танилцуулга, “Hunnu smart city” болон Сэлбэ дэд төвийг түшиглэсэн орон сууцны төлөвлөлтийн талаар мэдээлэл хийв.

Уулзалтанд Нийслэлийн Иргэдийн төлөөлөгчдийн хурлын төлөөлөгч, “Улаанбаатар орон сууцжуулалт” ХХК-ийн Гүйцэтгэх захирал З.Төмөртөмөө, Нийслэлтийн орон сууцны бодлогын газрын дарга Г.Ганхүү, НОСК-ийн Гүйцэтгэх захирал М.Говьсайхан, Шинэ Зуунмод хотын Захирагчийн чиг үүргийг хэрэгжүүлэх хотын бүтээн байгуулалт, хөгжлийн асуудал хариуцсан бүрэн эрхт төлөөлөгч М.Батбаяр нар оролцож нээлттэй ярилцлаа.

Гадаадын зочин төлөөлөгчдийн тухайд, Бүгд найрамдах Вьетнам улсын ROX группын ТУЗ-ийн дарга Nguyen Thi Nguyet Huong, ROX Living Global компанийн гүйцэтгэх захирал Tran Thi My Loc, R&D компанийн захирал Nguyen Hai Chau, ROX группын Бизнес хөгжлийн захирал Le Quang Vu, ROX Living Global компанийн ахлах мэргэжилтэн Lam Thi Hong Chi нар хүрэлцэн ирж, төсөл арга хэмжээ, компанийн үйл ажиллагаатай танилцсан юм.

Вьетнамын ROX группын хувьд үл хөдлөх хөрөнгө, сэргээгдэх эрчим хүч, банк санхүү, иргэдэд мэдээлэл технологийн чиглэлээр үйлчилгээ үзүүлдэг томоохон групп юм. Англи, Франц гээд дэлхийн олон орнуудад зочид буудал, банк санхүү, үл хөдлөхийн хөрөнгө оруулалтыг хийсэн төдийгүй 400 гаруй төслийг хэрэгжүүлжээ. Хамгийн сүүлд, Кыргызстанд 2 тэрбум долларын хөрөнгө оруулалтыг хийсэн олон жилийн туршлагатай томоохон компани аж.