“Улаанбаатар хотын бүтээн байгуулалтын танилцуулга” мэдээллийн цагт Улаанбаатар орон сууцжуулалт ХХК оролцлоо

Нийслэлийн нутгийн захиргааны байгууллагуудын албан хаагчдад зориулсан “Улаанбаатар хотын бүтээн байгуулалтын танилцуулга” мэдээллийн цаг 2026 оны 4 дүгээр сарын 8-10-ны өдрүүдэд Нийслэлийн нутгийн захиргааны байгууллагын цогцолбор барилгын “А” блок, Хүндэтгэлийн танхим, Чингэлтэй дүүргийн Онцгой байдлын ерөнхий газар болон холбогдох заалуудад зохион байгууллаа.

Тус арга хэмжээний хүрээнд өнөөдөр Улаанбаатар хотод 2025-2028 оны хооронд хэрэгжүүлэх мега төслүүдийн танилцуулга, дэд бүтцийн томоохон бүтээн байгуулалтын ажлуудын явц, цаашдын төлөвлөлтийн талаар мэдээлэл өгөв. Тухайлбал, Нэгдсэн төслийн удирдлагын газрын захирал Э.Түвшинжаргал Улаанбаатар хотын 2025-2028 онд хэрэгжүүлэх мега төслүүдийн ерөнхий төлөвлөлтийг танилцуулсан бол Нийслэлийн Замын хөгжлийн газрын дарга Б.Одбаяр, Туулын хурдны зам ОНӨААТҮГ-ын захирал Т.Батзориг нар Туулын хурдны замын төслийн явц, хэрэгжилтийн талаар дэлгэрэнгүй мэдээлэл өглөө.